【捱足29年】麥包本月約滿隨時拜拜 講到眼濕濕:未試過咁傍惶!

HuaLuMi     2016-11-18     0     檢舉

在無綫服務29年的麥包,今個月將會約滿,但合約一事仍未達成共識,即係話麥包好大機會離巢。麥包飾演過無數經典角色,2010年《巾幗梟雄之義海豪情》的非凡哥,上一輯《愛.回家》的寬哥,演技不容置疑,他昨晚出席《街市遊樂團》煞科宴表示,這一年過得不容易,2月拍完《愛.回家》後,就未拍過劇,令他一度懷疑自己,他說:「我都有諗過呢個問題,我係咪已經冇咗價值呢?如果我真係冇,我自己都要離開,人哋留你都唔好意思啦,(有冇懷疑過自己?)有呀,我今年係好懷疑,係咪我自己做戲唔得?定係我平時講嘢得失人?係咪呢?我唔知,我亦冇答案,亦令我唔知點算?」

【捱足29年】麥包本月約滿隨時拜拜 講到眼濕濕:未試過咁傍惶!

《親親我好媽》男主角原是麥包,但最後變了黃智賢。(資料圖片)

自《巾幗2》非凡哥後,麥包星途上升,連續多套劇集做男二,戲份很多時搶鏡過男一,今年初劇集《親親我好媽》男一原本是麥包,可以正式上位,但最後換了是黃智賢,麥包連一個角色都沒有,在劇集中消失,這件事令麥包失去自信,他說:「其實呢啲事件(換角)成日有,對我嚟講唔係打擊,一個演員始終想上多步,如果話咗俾我聽,我就會好開心,當然呢樣嘢成日有,但今次發生喺我身上,我自己有唔開心,同埋有失落,係咪有咩事到而家都唔知,係咪我做得唔好?我係咪有咩做錯?我自己都唔知,有人唔鍾意我?定係我得失咗人哋?或者我未夠班?諸如此類,我完全唔知,好迷失,我對自己冇咗信心。」

Sponsored Links

【捱足29年】麥包本月約滿隨時拜拜 講到眼濕濕:未試過咁傍惶!

麥包2月拍完《愛.回家》後就沒有再拍新劇,令他感到無所適從。(網上圖片)

麥包在電視城人緣不錯,訪問亦有求必應,但原來只懂密密做,不懂得討好高層,他說:「以前做好份約,我就上去簽,佢哋叫我上去傾,我話唔駛傾啦,上嚟簽得啦,我剩係識做嘢,高層我唔識,人哋更加唔識我係邊個,但好多謝TVB,珍姐畀咗好多機會我,我只係想要自由度,試多啲新嘢,同多啲人合作。(要做男一?)我冇提出過,做咗咁多年,錢唔係搵得多,又唔係紅,我只係好想享受演戲過程,唔好理我做得好唔好,但我好鍾意做戲,冇得做我會好失落。過多兩年,年老色衰,想轉就更加難,趁而家仲有力氣,仲想做啲嘢,仲有火未變鹹魚之前,做一啲自己想做嘅嘢。」

Sponsored Links

相關文章

【鏡頭以外】新光戲院續租轉型 江美儀麥包豹哥演《羅生門》

本週六(19日)無綫49週年台慶,麥包可能最後一次出席,他最不捨一班同事,他說:「做咗29年,今年好迷茫,睇唔到前境,年初發生咗所謂嘅換角事件,之後一路都冇工開,自己未試過咁傍惶,唔知點算,自己亦有頭家要照顧,今年係諗多咗嘢,而家都仲傾緊,但未知......我踏出學校門口,就係TVB嘅門口,未離開過呢行同TVB,所以你問我行出TVB門口,我都好傍惶,所以都唔知點?但我唔怕重新嚟過,如果呢到冇機會,都想出面試下,或者同唔同嘅人合作,最唔捨得係一班梳頭、化妝、服裝,演員、製作團隊,無論自己高低起跌,遇到問題嘅時候,走埋嚟拍拍你膊頭,打你心口一鎚,係令你好溫暖,令你覺得有人撐住。」

Sponsored Links

【捱足29年】麥包本月約滿隨時拜拜 講到眼濕濕:未試過咁傍惶!

麥包沒有劇拍,轉拍綜藝節目,剛拍完《街市遊樂團》,收視亦不俗,將會開拍《屋邨遊樂團》,未知麥包會否再出現。(網上圖片)